اهم ما يمكن معرفته عن الالكترونى فى الموتوسيكل

بسم الله الرحمن الرحيم 

نقدم لكم معلومات مفصلة بقدر الامكان عن هذه القطعه الموجوده فى الصوره وهى تسمى بالالكترونى وهى من اهم القطع فى دايره تشغيل البوجية فى الموتوسيكل وهى عباره عن دمج لمجموعة من الاسلاك وكل سلك داخل على الالكترونى يقوم بعمل مختلف 

وهو يعتبر مكثف يقوم برفع قدره الكهربا الداخله عليه واخراجها بقدر اكبر

 لادخالة على موبينة التكرير وهى بدورها بترفعة لقيمة اكبر قبل توصيلها للبوجيه لينتج عن قوة الكهربا صاعقة كهربائية تساعد البوجية لتحويلها لشعله نار وده السبب الرئيسى لحرق الوقود داخل الموتور ولللكترونى اشكال مختلفة وقوه مختلفة واحيانا دايرة الكترونية مختلفة.

 فنجد شكل الالكترونى اللذى يعمل على كهربة البطارية حجمة اكبر ويكتب عليه12 فولت.

 ونجدة فى المكنة الداين6 له 3 اشكال مختلفين وفى البنيلى شكل مختلف وحجم مختلف وقيمة الكهربا المغزيه له تختلف.

 فمنها ما يعتمد على مخدة فى ملف الكهربا لتغزيتة بالكهربا اللازمة لتشغيلة ومنها من يعتمد على كهربة البطاريه ال12 فولت.

 وده موجود فى انواع معينة من التروسيكل وكمان موجود فى الداين 6 والبينيلى بانواعة.

اما الاختلاف من ناحية الدايرة الالكترونية فموجود فى الداين 6 والبينيلى بمعنى ان الالكترونى ال12 فولت الموجود فى التروسيكل مختلف الكترونيا عن الموجود فى الداين 6.

ولذلك لو قمت بتوصيلة فلن يعمل  بل وسيحترق فى الحال .

ونرجع لوظيفة كل سلك داخل الالكترونى فى الموتوسيكلات الصينى.

فنجد سلك اسود بخط احمر وده هو المغذى الرئيسى للالكترونى بالكهربا من المخدة المنتجه للكهربا من ملف الكهربا.

وهذا النوع لا يعتمد على البطارية لتشغيل الموتور سوى لتشغيل المارش فقط .

بمعنى انه ان كان لا يوجد بطاريه يمكنك تشغيل الموتور بالمنفلا.

 وذلك لان انتاج الكهربا للتشغيل معتمد على دوران المغناطيسه حول ملف الكهربا .

ونجد سلك باللون الاخضر السادة وده ارضى داخل على الالكترونى علشان يقوم بمهمتة لان اى دايرة كهربائية تحتاج للكهربا وللارضى علشان تشتغل .

وهو  مغذى لطرف اخر بالارضى داخل على الالكترونى وهو سلك لونه اخضر بخط ابيض وده بيغذى لاقط الملف الموجود داخل وش الكهربا بالارضى .

 وعند دوران المغناطيسة يوجد على ظهر المغناطيسة جزئ بارز وعند مروره تحت لاقط الملف يقوم بجزب جزئ داخل اللاقط لنحصل على ارضى متقطع مرتبط بكل دوره كاملة للمغناطيسة تعطينا امر واحد فقط وهو ما نحتاجة لاصدار شعلة الحريق فى البوجية.

ونجد السلك الحامل للارضى المتقطع لونه ازرق بخط ابيض ومصدره لاقط الملف ونهايتة فى الالكترونى لاعطائه الامر باصدار دفعة كهربا قوية.

 وتمر هذه الدفعة من خلال سلك لونة اسود بخط اصفر وهو الناقل لهذه الكهربا القوية الى موبينة التكرير  وده نهاية المطاف وهو كهربا منسقه بحيث كل دوره للمغناطيسه تعطينا شراره فى البوجيه اثناء وجود البستم فى اعلى نقطة.

 وقوية بحيث يساعد الموبينة لرفعها لدرجه اكبر فينتج عنها صاعقة كهربائية فى البوجية وده هو مصدر الحريق فى الموتور البنزين .

وسنجد اخر طرف موجود فى الالكترونى ويحمل اللون ابيض بخط اسود وده وظيفتة عمل ايقاف للكهربا الصادره من الالكترونى فى اتجاه موبينه التكرير.

 وهو بيكون ارضى يعنى لو تخيلنا طريقة عمله سنجده نفس شغل كتاوت الكلكس (الريليه)عند توصيل ارضى سيعمل على توصيل طرفين لملف كهربا وهو ما ينتج مغناطيس .

وهو ما يجزب طرف من طرفين متلامسين بالفعل فيتم فصل خط الكهربا المتجه للموبينة وبكدا يكون تم وصف الالكترونى باكبر قدر مستطاع لدينا.

 ونتمنى من الله ان يكون ما تعبنا فيه مفيد لكم ونتمنا من الله ان يوفق الجميع